5 ເຫດຜົນ ທີ່ຄວນໄປທ່ຽວຊົມພະລາດຊະວັງ

ຫຼວງພະບາງຖືກສ້າງຕັ້ງເປັນນະຄອນຫຼວງມາແຕ່ໃນສະໄໝຂອງອານາຈັກລາວລ້ານຊ້າງ, ພະລາດຊະວັງເກົ່າ ສ້າງຕັ້ງໃນປີ ຄ.ສ 1904 ໃນສະໄໝຂອງເຈົ້າ ສີສະຫວ່າງວົງ. ນັບແຕ່ປີ ຄ.ສ 1975​ ເປັນຕົ້ນມາໄດ້ກາຍມາເປັນຫໍພິພິພດຕະພັນແຫ່ງຊາດຫຼວງພະບາງ, ປັດຈຸບັນ ເຕັມໄປດ້ວຍສິ່ງຂອງທີ່ໜ້າສົນໃຈ ແລະ ເລື່ອງລາວປະຫວັດສາດທີ່ກ່ຽວຂ້ອງກັບເຈົ້າຊີວິດ.

1. ສິ່ງຕົກແຕ່ງດ້ວຍສີຄໍາ

luangprabang_laos_nationalmuseum

ຢູ່ພາຍໃນພະລາດຊະວັງ ບັນລັງຂອງເຈົ້າຊີວິດເປັນຫ້ອງທີ່ເຕັມໄປດ້ວຍຄວາມງົດງາມ, ເຕັມໄປດ້ວຍສີຄໍາ ບໍ່ວ່າຈະເປັນ ມົງກຸດ, ດາບ, ພະພຸດພະຮູບບູຮານ ແລະ ພະມະຫາທີ່ນັ່ງ, ລວມທັງ ກໍາແພງຂອງຫ້ອງກໍທາດ້ວຍສີແດງເລືອດ ແລະ ປະດັບດ້ວຍສີຄໍາ, ແກ້ວໂມເຊັກທີ່ບອກເລົ່າເລື່ອງລາວປະຫວັດສາດຂອງນະຄອນຫຼວງພະບາງ, ພາຍໃນຫ້ອງມີການຈັດສະແດງພະພຸດພະຮູບທີ່ມີຄ່າ ແລະ ງົດງາມທີ່ສຸດໃນປະເທດລາວບັນຈຸໄວ້ໃນຕູ້ແກ້ວ.

2. ພະພຸດພະຮູບຄູ່ບ້ານຄູ່ເມືອງຂອງປະເທດລາວ

luangprabang_laos_nationalmuseum

ພະພຸດພະຮູບທີ່ໄດ້ຮັບຄວາມເຄົາລົບບູຊາຫຼາຍທີ່ສຸດໃນປະເທດລາວວ່າກໍວ່າແມ່ນ ເປັນທີ່ຮູ້ຈັກກັນດີນັ້ນກໍຄື ພະບາງ, ຖືກປະດິດສະຖານຢູ່ຫໍພະບາງ ບໍລິເວນທາງເຂົ້າເບື້ອງຂວາມືຂອງຫໍພິພິດຕະພັນແຫ່ງຊາດຫຼວງພະບາງ, ພະບາງມີຄວາມສູງ 83 ຊັງຕີແມັດ, ເຮັດດ້ວຍທອງສໍາລິດ, ສັນນິຖານວ່າຖືກສ້າງຂຶ້ນໃນປະເທດ ສີລັງກາໃນສັດຕະວັດທີ 1-9 ເຊິ່ງເຈົ້າຊີວິດຂະເໝນໄດ້ນໍາໄປປະດິດສະຖານໄວ້ທີ່ນັ້ນ ເພື່ອສັກກະລະບູຊາທາງພິທີທາງສາສະໜາພຸດນິກາຍໃນພພູມມີພາກແຫ່ງນີ້, ໃນປີ ຄ.ສ 1778 ສະຫຍາມໄດ້ນໍາເອົາພະບາງໄປປະເທດເຂົາ, ສົ່ງຄືນມາດິນແດນລ້ານຊ້າງອີກຄັ້ງໃນປີ ຄ.ສ 1782, ໄດ້ຖືກກັບໄປສະຫຍາມອີກຄັ້ງໃນປີ 1828 ແລະ ເອົາຄືນມາໃນລາວອີກໃນປີ ຄ.ສ 1867. ປັດຈຸບັນ ພະບາງ ຖືກປະດິດສະຖານໄວ້ໃນຫໍພະບາງ ຫໍພິພິພດຕະພັນແຫ່ງຊາດຫຼວງພະບາງ, ໃນທຸກໆປີໃນຊ່ວງເທດສະການປີໃໝ່ລາວກໍໄດ້ອັງເຊີນພະບາງມາໄວ້ທີ່ວັດໃໝ່ ເພື່ອໃຫ້ປະຊາຊົນໄດ້ຫົດສົງຕາມພິທິທາງສາສະໜາ.

3. ສະຖາປັດຕະຍະກໍາ ແລະ ສິລະປະ

luangprabang_laos_nationalmuseum

ສະຖາປັດຕະຍະກໍາອັນເກົ່າແກ່ເປັນຈຸດເດັ່ນອີກອັນໜຶ່ງທີ່ໜ້າສົນໃຈເຮັດໃຫ້ຫຼົງໄຫຼໃນຄວາມງົດງາມ, ສະຖາປັດຕະຍະກໍາຂອງພະລາດຊະວັງເກົ່າແຫ່ງນີ້ ເປັນການປະສົມປະສານລະຫວ່າງແບບລາວ ແລະ ຝຣັ່ງ, ດ້ານໜ້າມີຫຼັງຄາມຸງກະເບື້ອງ, ທາງກາງມີມຸກຍື່ນອອກມາ, ມີຮູບຊ້າງສາມຫົວ ເປັນສັນຍາລັກຂອງອານາຈັກລາວລ້ານຊ້າງ, ອາຄານເຮັດຈາກຫີນອ່ອນອີຕາລີ, ສ່ວນພາຍໃນເຮັດດ້ວຍໄມ້ທີ່ລວດລາຍໂດຍສະເພາະຫ້ອງຂອງເຈົ້າຊີວິດ ແລະ ມະເຫສີ, ພາບວາດໃນຝາຜະໜັງໄດ້ວາດຂຶ້ນໃນປີ ຄ.ສ 1930 ໂດຍສິລະປະຊາວຝຣັ່ງຊື່ ອາລີສ ເດີໂຟເຕີໂຣ, ລວດລາຍບອກເລົ່າເລື່ອງລາວວິຖີຊີວິດຂອງປະຊາຊົນລາວໃນການເຮັດກິດຈະກໍາຕ່າງໆ, ຫ້ອງຮັບແຂກມີຮູບພາບຂະໜາດໃຫຍ່ຮູບຂອງເຈົ້າຊາຍ ສີສະຫວ່າງ ວັດທະນາ, ພະນາງ ຄໍາຜູຍ ແລະ ເຈົ້າຟ້າຊາຍມົງກຸດລາດຊະກຸມມານວົງສະຫວ່າງ ໂດຍສິລະປະຊາວລັດເຊຍ ຊື່ ອິນຢາ ກາຊູນອຟ ໃນປີ ຄ.ສ 1967.

4. ວິຖີຊີວິດ

luangprabang_laos_nationalmuseum

ຕຽງໄມ້ສັກແບບດັ້ງເດີມທີ່ເຮັດດ້ວຍມື, ສໍາລັບເຈົ້າຊາຍ ແລະ ເຈົ້ນຫຍິງ ຍັງຄົງຮັກສາໄວ້ຢູ່ໃນອາຄານໃຫ້ມີຄວາມຮູ້ຄືກັບຍັງມີພະລາຊະວົງຍັງຄົງປະທັບຢູ່, ນອກຈາກນີ້ຍັງມີເຄື່ອງໃຊ້ຂອງສອຍອື່ນໆທີ່ຍັງເກັບຮັກໄວ້ໃນຕູ້ແກ້ວວາງໄວ້ຕາມທາງຍ່າງດ້ານໃນໃຫ້ທ່ານໄດ້ທ່ຽວຊົມ, ໂຕະອ່ານໜັງສື, ຫ້ອງຄົວ ລ້ວນແຕ່ສະແດງໃຫ້ເຫັນເຖິງກິດຈະວັດປະຈໍາວັນຂອງພະລາຊະວົງ, ດ້ານຫຼັງຂອງພະລາດຊະວັງ ຈະໄດ້ເຫັນລົດໃນແບບບູຮານຍີ່ຫໍ້ Lincoln Continentals ຜະລິດໃນປີ ຄ.ສ 1960, ຍັງມີຍີ່ຫໍ້ Citroën DS ແລະ ຍີ່ຫໍ້ Edsel Citation. ນອກຈາກນີ້ ຍັງມີເຮືອພະທີ່ນັ່ງຂອງເຈົ້າຊີວິດເຮັດຈາກໄມ້ເນື້ອດີ ເພື່ອຮັບໃຊ້ໃນຊີວິດປະຈໍາວັນ.

5. ຂອງທີ່ລະນຶກຈາກຕ່າງແດນ

ໃນຫ້ອງຮັບຮອງຈະເຕັມໄປດ້ວຍ ເຄື່ອງເງິນ ສິ່ງທໍ ເຄື່ອງປະດັບ ເຊິ່ງເປັນຂອງຂວັນຈາກຕ່າງປະເທດຈັດວາງສະແດງໃຫ້ໄດ້ເຫັນ ຂອງທີ່ລະນຶກຈາກຫຼາຍປະເທດ ເຊັ່ນ: ຈາກປະເທດອອກສເຕເລຍ, ຍີປຸ່ນ, ມຽນມາ, ຫວຽດນາມ, ກໍາປູເຈຍ, ເນປານ, ລັດເຊຍ, ໂປແລນ, ລາຊະອານານຈັກໄທ, ຮັງັກາລີ, ຈີນ, ອາເມຣິກາ ແລະ ການາດາ.