5 ເຫດຜົນ ທີ່ຄວນໄປທ່ຽມຊົມເມືອງຈອມເພັດ

ພຽງແຕ່ຂີ່ເຮືອຂ້າມແມ່ນໍ້້າຂອງຈາກຝັ່ງນະຄອນຫຼວງພະບາງ ໄປຫາເມືອງຈອມເພັດ, ເມືອງທີ່ໃຫ້ຄວາມຮູ້ສຶກຄືກັບການເຂົ້າໄປຢູ່ໃນດິນແດນອີກອີກໂລກໜຶ່ງ, ຈະໄດ້ເຫັນວິຖີຊີວິດຂອງຊາວປະຊາຊົນ, ການປຸ່ງແຕ່ງອາຫານດ້ວຍເຕົາຖ່ານ, ທ່ານຈະພົບກັບບັນດາວັດວາອາຮາມອັນເກົ່າແກ່ ແລະ ນໍ້າຕົກຕາດທີ່ສວຍງາມພ້ອມກັນຫຼິ້ນກິດຈະກໍາແບບປະຈົນໄພທີ່ໜ້າຕື່ນເຕັ້ນ.. ແລ້ວທ່ານເຄີຍໄດ້ໄປທ່ຽວເມືອງຈອມເພັດແລ້ວ ຫຼື ບໍ່?.

1. ວັດວາອາຮາມທີ່ເກົ່າແກ່

ຄວາມງົດງາມຂອງສະຖາປັດຕະຍະກໍາວັດວາທີ່ເກົ່າແກ່ ວັດຊຽງແມນ ທີ່ມມຸງລັງຄາແບບດັ້ດງເດີມ ແລະ ພື້ນທີ່ປູດ້ວຍກະໂລ່ແບບຝຣັ່ງ. ພົບກັບສະເໜ່ ແລະ ທິວທັດອັນສວຍງາມເມື່ອທ່ານເດີນທາງຂຶ້ນຂັ້ນໄດໄປ 123 ຂັ້ນ ທີ່ວັດຈອມເພັດ ເຊິ່ງຕັ້ງຢູ່ຈອມພູເພັດ. ຖັດຈາກວັດຈອມເພັດກໍຈະເຫັນວັດລ້ອງຄູນເປັນສະຖານທີ່ ທີ່ເຈົ້າຊາຍລາວໄປນັ່ງສະມາທິ 7 ວັນ ກ່ອນຂຶ້ນຄອງລາດ, ເຫັນຮູບພາບຫໍ້ແຕ້ມໄວ້ປະຕູດ້ານໜ້າຂອງວັດນີ້ ໃນປີ ຄ.ສ 1890.

2. ບ້ານຫັດຖະກໍາເຄື່ອງປັ້ນດິນເຜົາ

ບ້ານຈ່ານເໜືອເປັນບ້ານຫັດຖະກໍາເຄື່ອງປັ້ນດິນເຜົາ ປະຊາຊົນບ້ານນີ້ມີຄວາມຊໍານານໃນການປັ້ນດິນໂດຍສືບທອດກັນມາຫຼາຍສັດຕະວັດຜ່ານມາແລ້ວ, ເລີ່ມຕັ້ງແຕ່ສັດຕະວັດທີ່ 16 ໄດ້ມີການຈັດງານສະເຫຼີມສະຫຼອງຄັ້ງໃຫຍ່ພາຍຫຼັງໄດ້ຮັບໄຊຊະນະສົງຄາມ, ເຊິ່ງພະອົງໄດ້ໃຫ້ແຕ່ລະບ້ານເອົາເຄື່ອງຂອງຂອງຕົນມາເຂົ້າຮ່ວມງານ, ຊາວບ້ານຈ່ານໄດ້ນໍາເອົາເຄື່ອງປັ້ນດິນເຜົາເຂົ້າມາຮ່ວມໃນງານດັ່ງກ່າວ.

ບ້ານຈ່ານເໜືອຫ່າງຈາກເທດສະບານເມືອງຈອມເພັດພຽງ 4 ກິໂລແມັດ, ການເດີນທາງເຂົ້າເຖິງສະດວກສະບາຍ, ຂີ່ລົດ, ຂີ່ເຮືອໄປກໍໄດ້. ເປັນໂອກາດດີທີ່ທ່ານຈະໄດ້ປະສົບການໃນການປັ້ນດິນດ້ວຍໂຕທ່ານເອງກໍສາມາດເຮັດໄດ້.

3. ການປະຈົນໄພໂອ່ນສະລິງ

ເມືອງຈອມເພັດເປັນສະຖານທີ່ເຕັມໄປດ້ວຍປ່າໄມ້ທໍາມະຊາດ, ທ່ານຈະມ່ວນຊື່ນໄປກັບການຫຼິ້ນກິດຈະກໍາ The Green Jungle Flight ຈະມອບປະສົບການອັນໜ້າຕື່ນເຕັ້ນ ຫຼິ້ນກິດຈະກໍາໂອ່ນສະລິງ, ໂອ່ນເຊືອກ ໄລຍະທາງ 1 ກິໂລແມັດ, ມີ ທັງໝົ້ດ 12 ດ່ານໃນທ່າມກາງປ່າໄມ້ໃຫຍ່, ມີອຸປະກອນທີ່ຮັບປະກັນຄວາມປອດໄພໄດ້ມາດຕະຖານ, ຮັບຮອງວ່າທ່ານຈະໄດ້ພົບກັບຄວາມຕື່ນເຕັ້ນແນ່ນອນ, ຖືວ່າຄຸ້ມຄ່າກັບການເດີນທາງທ່ອງທ່ຽວສະຖານທີ່ແຫ່ງນີ້.

4. ໄດ້ເຫັນມູມມອງທີ່ແຕກຕ່າງ

ເມືອງຈອມເພັດ ຍັງເປັນເມືອງໜຶ່ງທີ່ພວມກໍາລັງພັດທະນາໃນລະດັບຂັ້ນພື້ນຖານຕັ້ງຢູ່ກົງກັນຂ້າມກັບນະຄອນຫຼວງພະບາງພຽງຂ້າມແມ່ນໍ້າຂອງ, ຍັງມີຫຼາຍຄອບຄົວດໍາລົງຊີວິດແບບລຽບງ່າຍ, ເຫັນວິຖີຊີວິດແບບດັ້ງເດີມດັງໄຟດ້ວຍເຕົາໄຟ ຫຼື ເຕົາຖ່ານ, ລ້ຽງສັດ, ຊອກຫາສະບຽງອາຫານຕາມທໍາມະຊາດ. ເມື່ອທ່ານເດີນທາງທ່ຽວລວງ ຖ້າຫາກທ່ານຢາກເຫັນວິຖີຊີວິດແບບດັ້ງເດີມກໍສາມາດເດີນທາງໄປທ່ຽວຊົມເມືອງຈອມເພັດ ເພື່ອສົ່ງເສີມປະຊາຊົນທ້ອງຖິ່ນດ້ວຍ.

5. ນໍ້າຕົກຕາດຮ້ອຍຄົວ

ແຂວງຫຼວງພະບາງ ມີນໍ້າຕົກຕາດທີ່ມີຊື່ສຽງຫຼາຍແຫ່ງ ເຊັ່ນ: ນໍ້າຕົກຕາດກວາງຊີ, ນໍ້າຕົກຕາດແສ້, ສໍາລັບເມືອງຈອມເພັດແລ້ວກໍມີນໍ້າຕົກຕາດທີ່ສວຍງາມຄື ຕາດຮ້ອຍຄົວ ຢູ່ໃນໃຈກາງປ່າໄມ້ຂຽວສົດຕະຫຼອດປີ, ມີຄວາມສູງ 100 ແມັດ ມີນໍ້າຕົກຈາກໜ້າຜາອັນສູງຊັນຕົກກະຈາຍເຮັດໃຫ້ມີຄວາມງົດງາມ, ເປັນສະຖານທີ່ ທີ່ເໝາະສໍາລັບການພັກຜ່ອນຢ່ອນໃຈ ເພາະມີຄວາມສະຫງົບ, ອາກາດບໍລິສຸດ, ສໍາຜັດກັບຄວາມເຢັນຈາກປ່າໄມ້ໃຫຍ່ ໂດຍສະເພາະຊ່ວງລະດູຮ້ອນເປັນເວລາທີ່ເໝາະແກ່ການໄປພັກຜ່ອນ, ທ່ານສາມາດລົງອາບນໍ້າໄດ້, ນອກຈາກນີ້ກໍຍັງໄດ້ຊົມທິວທັດທໍາມະຊາດສວຍນດອກໄມ້ທີ່ສວຍສົດງົດງາມ ນີ້ຄືຄວາມມະຫັດຈັນຂອງທໍາມະຊາດນໍ້າຕົກຕາດແຫ່ງນີ້, ມີສະຖານພັກແຮມ ແລະ ອາຫານຄອຍໃຫ້ບໍລິການແກ່ທ່ານໄດ້ຢ່າງສະດວກສະບາຍ.