5 ສະຖານທີ່ທ່ອງທ່ຽວ ຊົມວິຖີຊີວິດຂອງປະຊາຊົນທ້ອງຖິ່ນ

ຖ້າທ່ານມີຄວາມສົນໃຈຢາກທ່ຽວຊົມວິຖີວິດ, ການເປັນຢູ່, ການທໍາມາຫາກິນ, ການໃຊ້ຊີວິດຂອງຄົນໃນທ້ອງຖິ່ນ, ມີສະຖານທີ່ແນະນໍາໃຫ້ທ່ຽວຢູ່ຫຼວງພະບາງ ຢ່າພາດທີ່ຈະໄປທ່ຽວຊົມ.

1. ບ້ານຊຽງເຫຼັກ

ເປັນບ້ານທີ່ງຽບສະຫງົບຢູ່ບໍ່ໄກຈາກໃຈກາງເມືອງ, ຍັງຄົງຮັກສາຄວາມເປັນເອກະລັກດັ້ງເດີມໃຫ້ໄດ້ເຫັນ, ເວລາຂີ່ລົດຖີບ ຫຼື ຍ່າງຜ່ານໄປກໍຈະເຫັນ ສະຖານທີ່ເກົ່າແກ່ຂອງວິຫານ, ຕົ້ນໄມ້ໃຫຍ່ ແລະ ຊາວບ້ານເຮັດກິດຈະກໍາຕາມວິຖີຂອງຊາວບ້ານ, ເພາະບ້ານຕັ້ງຢູ່ແຄມແມ່ນໍ້າຂອງ ເປັນຄວາມສວຍງາມອີກແຫ່ງໜຶ່ງ.

2. ສວນສາທາລະນະ ອານຸສາວະລີ ປະທານສຸພານຸວົງ

ເປັນສວນສາທາລະນະໃນໃຈກາງເມືອງ ເຖິງວ່າມີເນື້ອທີ່ບໍ່ກວ້າງປານໃດ ແຕ່ຜູ້ຄົນມັກຈະຍ່າງຫຼິ້ນ ເພື່ອອອກກຳລັງກາຍ ຫຼື ຜ່ອນຄາຍ, ທາງເຂົ້າສວນສາທາລະນະ ມີຮ້ານຂາຍເຄື່ອງດື່ມ, ເຂົ້າໜົມປະເພດຕ່າງໆ ຕາມແຄມທາງ. ຈຸດເດັ່ນຂອງສວນ ມີຮູບປັ້ງຂອງ ປະທານສຸພານຸວົງຢືນສະຫງ່າຢູ່ໃຈກາງສວນ, ມີຄວາມສູງ 6 ແມັດ, ນໍ້າໜັກປະມານ 4 ຕັນ, ສາມາດແນມເຫັນຈາກເສັ້ນທາງໄດ້ຢ່າງຊັດເຈນ. ສະຖານທີ່ແຫ່ງນີ້ເໝາະສໍາລັບໄປນັ່ງຜ່ອນຄາຍ.

3. ລອງເຮືອຕາມແມ່ນໍ້າຂອງ

ໃນແຕ່ລະຊ່ວງຂອງທຸກໆວັນ ຈະເຫັນວິຖີຊີວິດຂອງປະຊາຊົນໂດຍສະເພາະຊາວປະມົງທີ່ຫາປາແຄມແມ່ນໍ້າຂອງ, ເຫັນເດັກນ້ອຍລົງອາບນໍ້າ ແລະ ເຮືອທ່ອງທ່ຽວທີ່ໃຫ້ບໍລິການນັກທ່ອງທ່ຽວຕາມລໍາແມ່ນໍ້າ, ຊາວບ້ານສ່ວນຫຼາຍມາລົງທ່າເຮືອເພື່ອລໍຖ້າຂ້າມຝັ່ງທຽວໄປ-ມາຫາສູ່ກັນມາແຕ່ອາດີດ. 

4. ທ່ຽວຊົມວັດ

wat-xiengman-luangprabang-laos

ວັດວາອາຮາມເປັນສະຖານທີ່ ທີ່ສັງເກດເຫັນໄດ້ຢູ່ທົ່ວໆໄປ, ເພາະພະພຸດທະສາສະໜາເປັນວັດທະນະທໍາທີ່ຍັງຄົງເດີມຢູ່ກັບວິຖີຊີວິດປະຈໍາວັນຂອງຊາວບ້ານ ໃນຕອນເຊົ້າຂອງທຸກໆວັນ ເຊັ່ນ: ການໃສ່ບາດດ້ວຍເຂົ້າໜຽວ, ການຕີກອງ, ການສູດມົນໄຫວພະໃນຍາມແລງ ເຊິ່ງເປັນປະສົບການຂອງນັກທ່ອງທ່ຽວທີ່ຈະໄດ້ເຫັນໃນການທ່ຽວຊົມວັດ, ໃຫ້ຄວາມເຄົາລົບໃນສາສະໜາຂອງຄົນລາວໂດຍການແຕ່ງກາຍໃຫ້ເໝາະສົມໃນເວລາເຂົ້າວັດ ແລະ ຢູ່ໃນຄວາມສະຫງົບ, ປິດສຽງໂທລະສັບ ເພື່ອບໍ່ໃຫ້ລົບກວນໃນເວລາເຮັດພິທີທາງສາສະໜາ, ວັດສ່ວນໃຫຍ່ຈະອານຸຍາດໃຫ້ຖ່າຍຮູບບາງສະຖານທີ່ທີ່ໄດ້ກໍານົດ ແລະ ຄວນໄດ້ຮັບການອານຸຍາດເສຍກ່ອນຈຶ່ງຖ່າຍຮູບໄດ້.

5. ສະໜາມກິລາແຂວງຫຼວງພະບາງ

ສະໜາມກິລາໃນຮົ່ມແຂວງຫຼວງພະບາງ ໄດ້ສ້າງຂຶ້ນຮອງຮັບການແຂ່ງຂັນກິລາແຫ່ງຊາດ ໃນປີ 2011, ມີຂະໜາດ 4000 ບ່ອນນັ່ງ ສໍາລັບກາກນແຂ່ງຂັນກິລາປະເພດຕ່າງໆ ເຊັ່ນ: ບານສົ່ງ, ບ້ານບ້ວງ, ເທັນນີສ, ຕີດອກປີກໄກ່, ປິ່ງປ່ອງ, ລອຍນໍ້າ ແລະ ອື່ນໆ. ເປັນສະຖານທີ່ ທີ່ຜູ້ຄົນມັກໄປອອກກໍາລັງກາຍໃນຕອນແລງ ຫຼື ມີກິດຈະກໍາໃນເວລາມີການແຂ່ງຂັນກິລາ ເຊິ່ງຈະເຫັນຜູ້ຄົນເປັນຈໍານວນຫຼາຍໄປພົບກັນຢູ່ທີ່ນີ້.