ສະໜາມສາກົນຫຼວງພະບາງ ຫ່າງຈາກຕົວເມືອງພຽງ 4 ກິໄລແມັດ, ເປັນສະໜາມບິນທີ່ສ້າງຂຶ້ນໃໝ່, ມີພື້ນທີ່ກ້ວາງຂວາງ ສະດວກສະບາຍ, ເປີດໃຫ້ບໍລິການໃນປີ 2013 ທ່ານຈະໄດ້ພົບກັບປະສົບການສໍາລັບການເດີນທາງ ທາງອາກາດ ບໍ່ວ່າຈະເຂົ້າ ຫຼື ອອກ ກໍສາມາດໃຊ້ບໍລິການໄດ້ຢ່າງສະດວກສະບາຍ.

• ຖ້ຽວບິນຫຼວງພະບາງແມ່ນ (LPQ).
• ຖ້ຽວບິນລະຫວ່າງປະເທດມີ: ຮາໂນ້ຍ, ຊຽງໃໝ່, ບາງກອກ, ສຽມຣຽບ, ຊຽງຮຸ່ງ, ສິງກາໂປ, ອິນຊອນ, ກວາງໂຈ ແລະ ກົວລາລໍາເປີ.
• ຖ້ຽວບິນພາຍໃນປະເທດມີ: ຫຼວງພະບາງ-ນະຄອນຫຼວງວຽງຈັນ, ຫຼວງພະບາງ-ປາກເຊ.

ການເດີນທາງໄປ-ກັບ ຈາກຕົວເມືອງຫາສະໜາມບິນ

• ຈາກສະໜາມບິນ: ອັດຕາຄ່າລົດຮັບ-ສົ່ງສະໜາມບິນ ລາຄາປະມານ 50,000 ກີບ ສົ່ງເຖິງທີ່ພັກຂອງທ່ານ, ທ່ານສາມາດຊື້ປີ້ລົດຢູ່ເຄົາເຕີທາງອອກຂອງສະໜາມບິນ ເພາະທາງສະໜາມບິນບໍ່ອະນາຍາດໃຫ້ລົດ ຕຸກຕຸກ ເຂົ້າໄປຮັບຢູ່ພາຍໃນສະໜາມບິນໄດ້.
• ໄປສົ່ງສະໜາມບິນ: ໃຊ້ເວລາປະມານ 15 ນາທີ, ສໍາລັບການນໍາສົ່ງໄປຫາສະໜາມບິນ ທ່ານສາມາດນໍາໃຊ້ ລົດຂອງໂຮງແຮມ ຫຼື ເຮືອນພັກ ທີ່ສາມາດຈັດຫາໃຫ້ໄດ້, ລາຄາປະມານ 50,000​-​60,000 ກີບ.