5 ອາຫານທີ່ຕ້ອງລອງຊິມໃນຫຼວງພະບາງ

ອາຫານຖືເປັນສິ່ງທີ່ຂາດບໍ່ໄດ້ ເມື່ອທ່ານໄດ້ມາທ່ຽວຫຼວງພະບາງ ສິ່ງທີ່ບໍ່ຄວນພາດເຊິ່ງຈະຕ້ອງໄດ້ຊິມອາຫານທີ່ເປັນເອກະລັກຂອງຫຼວງພະບາງແທ້.

1. ໄສ້ອົ່ວຫຼວງພະບາງ

luangprabang-food-laos

ທ່ານອາດຈະເຫັນໄສ້ອົ່ວທີ່ວາງຂາຍຢູ່ຕາມຮ້ານຂາຍອາຫານ ຕາມຕົວເມືອງ, ໄສ້ອົ່ວເຮັດມາຈາກຊີ້ນໝູປຸງລົດດ້ວຍເຄື່ອງຫອມ, ເຄື່ອງປຸງ ປະສົມໃຫ້ເຂົ້າກັນແລ້ວຍັດໃນໄສ້ໝູ, ອາຫານພິເສດນີ້ມີຄວາມນິຍົມຈັດເປັນອາຫານໃນງານດອງ, ງານສ້າງສັນຕ່າງໆ, ໄສ້ອົ່ວອາດຈະມີລົດຊາດທີ່ແຕກຕ່າງກັນ, ມີປະເພດໄສ້ອົ່ວຊີ້ນ, ໄສ້ອົ່ວເຄື່ອງ, ໄສ້ອົ່ວເລືອດ, ເຊິ່ງລົດຊາດຂຶ້ນກັບການປຸງຂອງແຕ່ລະຮ້ານ.

2. ແຈ່ວໝາກເຂືອກັບເຂົ້າໜຽວ

ຫາກວ່າທ່ານກໍາລັງຊອກຫາອາຫານທີ່ດີຕໍ່ສຸຂະພາບ ແລະ ມີລົດແຊບໃຫ້ລອງຊີມເມນູ ແຈ່ວໝາກເຂືອ , ເປັນເມນູຍອດຮິດໃນ້ຮານອາຫານລາວ, ເປັນການນໍາເອົາໝາກເຂືອຍາວມາເຜົາໄຟໃຫ້ສຸກແລ້ວປອກເປືອກຕໍາໃສ່ເຄື່ອງໝາກເຜັດ, ປັກທຽມ ແລະ ເຄື່ອງປຸງລົດ, ຕາມດ້ວຍຫອມປ້ອມຊອຍໃສ່ ກິນກັບເຂົ້າໜຽວແຊບຫຼາຍ.

3. ອາຫານປະເພດປີ້ງ

food_luangprabang_laos

ທ່ານຈະເຫັນຮ້ານຂາຍປີ້ງຢູ່ທົ່ວໄປ ເຊິ່ງຫຼັກໆແມ່ນບໍລິເວນຕະຫຼາດເຊົ້າ ຫຼື ແຖວຕະຫຼາດກາງຄືນກໍມີຫຼາຍ ຂາຍປີ້ງຫຼາຍປະເພດ ເຊັ່ນ: ປີ້ງໄກ່, ປີ້ງປາ, ປີ້ງຊີ້ນສົ້ມ…ດ້ວຍການໝັກ ຫຼື ເອືອບເຄື່ອງເຮັດໃຫ້ມີກິ່ນຫອມ ແລະ ລົດຊາດແຊບຫຼາຍ, ກິນກັບເຂົ້າໜຽວ ຫຼື ຕໍາໝາກຮຸ່ງກໍຍິ່ງໄດ້ລົດຊາດທີ່ເຂົ້າກັນດີ.  

4. ໄຄແຜ່ນ

luangprabang-food-laos

ຫຼວງພະບາງ ຂຶ້ນຊື່ລືຊາເລື່ອງໄຄແຜ່ນ ເປັນອາຫານທີ່ມີເອກະລັກ ບໍ່ວ່າຈະເປັນໄໄຄແຜ່ນນໍ້າຂອງ, ນໍ້າຄານ, ນໍ້າບາກ. ສາລາຍນໍ້າຈືດ ຫຼື ຊາວບ້ານເອີ້ນວ່າໄຄແຜ່ນ ມີລົດຊາດແຊບທີ່ສຸດໃນອາຊີຕາເວັນອອກສ່ຽງໃຕ້, ເຊິ່ງໄຄແຜ່ນເປັນອາຫານພື້ນເມືອງຂອງຫຼວງພະບາງ ຊອກຊື້ໄດ້ທີ່ຫຼວງພະບາງເທົ່ານັ້ນ, ໂດຍສະເພາະໃນຊ່ວງລະດູແລ້ງຈະມີການເກັບໄຄຈາກແມ່ນໍ້າມາຕົບ, ລ້າງສະອາດ ແລະ ປຸງລົດຊາດ, ໂຮຍເມັດງາໃສ່ແລ້ວເຮັດເປັນແຜ່ນຕາກໃຫ້ແຫ້ງ, ຈາກນັ້ນກໍສາມາດເອົາມາຈືນກິນໄດ້ເລີຍ, ກິນກັບແຈ່ວ ຫຼື ກັບເບຍຍິ່ງມີລົດຊາດແຊບຄືກັນ, ໄຄແຜ່ນຄ້າຍຄືກັບສາລາຍຍີ່ປຸ່ງ ເຊິ່ງມີສານອາຫານ ແລະ ແຮ່ທາດທີ່ມີປະໂຫຍດຕໍ່ຮ່າງກາຍ.

5. ອາຫານປະເພດເສັ້ນ

ເປັນອາຫາຫານທີ່ໄດ້ຮັບຄວາມນິຍົມກັນຫຼາຍ, ຄົນສ່ວນໃຫຍ່ນິຍົມກິນອາຫານເຊົ້າເປັນປະເພດເສັ້ນເຊັ່ນ: ເຝີ, ເຂົ້າປຽກ, ເຂົ້າຊອຍ ເພາະມີຫຼາກຫຼາຍແບບໃຫ້ເລືອກ ແລະ ມີຢູ່ເກືອບບ່ອນ. ເສັ້ນເຂົ້າປຽກເຮັດຈາກແປ້ງ, ມີລັກສະນະເສັ້ນກົມ ແລະ ເສັ້ນອີກປະເພດໜຶ່ງທີ່ນິຍົມກັນເປັນເສັ້ນແປກໍມີ, ເຄື່ອງປຸງລົດດ້ວຍພິກ, ຊອດໝາກເລັ່ນ ແລະ ກິນກັບຜັກຫຼາຍຊະນິດ.